ދިވެހިރާއްޖޭގެ އުފެއްދުންތެރި އިޤުތިސާދާގުޅޭ އިސްތިރާޖީ ޕްލޭންގައި އަމަލީ ސިފަ ޖެހިގެން އަންކަމުގެ އަލިގަދަ ހެއްކަކަށްފުދޭ މި ޑިސްޓްރިކްޓަކީ ދިވެހި ފަންނުވެރިންގެ ހުނަރުތައް އެއްތަނަކުން ފެނިގެންދާނެ، ޑިސްޓްރިކްޓެއް. މި ޑިސްޓްރިކްޓަށް ޒިޔާރަތްކުރާ ފަރާތްތަކަށް ފަންނުވެރިންގެ މަސައްކަތްތެރިކަމާއި ގެންގުޅޭ އުކުޅުތައް ގާތުން ބަލާލުމުގެ ފުރުސަތު ލިބިގެންދާނެ. އަދި ވޯކްޝޮޕްތަކާއި ޒިޔާރަތްކުރާ ފަރާތްތަކުގެ ބައިވެރިވުން ހިމެނޭ އިތުރު ހަރަކާތްތައްވެސް މި ޑިސްޓްރިކްޓުގައި ކުރިއަށްދާނެ.

މި ޑިސްޓްރިކްޓަށް ޒިޔާރަތްކުރާ ފަރާތްތަކަށް ޒަމާނީ ތަރައްޤީއާއި ޓެކްނޮލޮޖީގެ ދާއިރާގައި ދިވެހިންނަށް އޮތް އުޖާލާ މުސްތަޤުބަލު ތަސައްވަރުކޮށްލެވޭނެ. ދިވެހިންގެ އަމިއްލަވަންތަ، އިންޤިލާބީ ބަދަލުތައް ގުނެސްދޭނެ ތަފާތު އެކި ސޮފްޓްވެއާތަކާއި، ދިވެހި އިންޖިނެއިރުންގެ ހުނަރު ދައްކުވައިދޭ އުފެއްދުންތަކާއި، ތަރައްޤީވަމުންއަންނަ އާޓިފިޝަލް އިންޓެލިޖެންސްގެ އެހީގައި އުފައްދާފައިވާ އުފެއްދުންތައް މި ޑިސްޓްރިކްޓްއިން ތަޖުރިބާކޮށްލެވޭނެ.

މައުރަޒުގެ މުނިފޫހިފިލުވުމުގެ ހަރަކާތްތަކުގެ މައި ޑިސްޓްރިކްޓުގެ ގޮތުގައި ފާހަގަ ކުރެވިގެންދާ މި ޑިސްޓްރިކްޓަކީ ހުރިހާ އުމުރުފުރާއަކާގުޅޭ މުނިފޫހި ފިލުވުމުގެ އެކި ހަރަކާތްތަށް ކުރިއަށްދާނެ ޑިސްޓްރިކްޓެއް. ފަންނާނުން ވަގުތުން ހުށަހަޅައިދޭ ޝޯތަކުން ފެށިގެންގޮސް ތަފާތު އެކި ކުޅިވަރުގެ ހަރަކާތްތައް މި ޑިސްޓްރިކްޓުގައި ކުރިއަށްދާނެ.

މީރު ކެއުންތަކާއި، ފޭރާމާއި، ރީތިވާ ސާމާނާއި، އަތްތެރި މަސައްކަތުގެ އުފެއްދުންތައްވެސް ލިބެންހުންނާނެ މި ބާޒާރަކީ އެއްތަނަކުން ތަފާތު ގިނަ ބާވަތްތަކުގެ އުފެއްދުންތައް ގަންނަން ލިބޭނެ ފޯރިގަދަ ބާޒާރެއް.